Enge Sual Tifai Thei Ang?
(A hla leh a phuahtu Chanchin)
 |
| A phuahtu - Robert Lowry |
‘Enge sual tifai thei ang’ (What can wash away my sin?) tih hla mawi tak hi kum 1876 khan Rev. R. Lowry chuan a phuah a. A Bible thu tlawhchhan chu Hebrai 9:22 na ‘...Dan thu zawngin engkim thaw mai hi thisena tihthianghlimin a awm thin a, thisen chhuah lovin ngaihdamna reng a awm lo’ tih hi a ni. A hla hi a ropuiin engtikahmah a chuai tawh ngai dawn lo, vawiin kum 135 chuang anih hnu pawh hian kan la sa tui em em zawng anih hi! Krista thisen hlu tak keini misual te tana luanga tihthianghlima kan lo awm dan te, a hrelo te hnena chanchin tha theh darh dan te chiang takin mi a zirtir hle in a hriat theih. Chutiang rilru pu chung chuan he hla kan sak chang te hian a phuahtu thlirpui thiam ila. A siamtu rilru han inchanin lung a tilenga, thil min ngaihtuah thuitir thei khawp mai.
He hla phuahtu Rev. R. Lowry a hla te hi Pathian fak hla sak na hmunah reng reng a hla phuah eng emaw ber hi chu hmaih a ni ngai lo. A hla phuah te hian khawvel hmun hrang hrang a Christian sang tamtak te nun a khawih danglam nasa em em a ni. Rev. R. Lowry pianna hmun hi Philadelphia, (Pennsylvania, United States) niin March ni 12 kum 1826 khan a lo piang a. Music lamah pawh mi nep lo tak niin naupang te anih lai atangin music lam kaihhnawih reng reng a khawih phak chin apiang a zir thiam thuai zel. Philadelphia Kohhran ah telin kum 17 anih chhoh chuan Sunday School zirtirtu leh zaipawl Conductor hial a ni der tawh mai! Kum 22 mi chauh anihin a hun puma Pathian rawngbawl turin a in pe a. Kum 28 ah University of Lewisburg, Pennsylvania atangin a graduate a, an class a ti tha ber a ni nghe nghe. A graduate kum atang vek hian hetiang hian Pasotr hna a thawk kual - West Chester, Pennsylvania (1854-1858); New York City (1859-1861); Brooklyn (1861-1869); Lewisburg, Pennsylvania(1869-1875). Rev. R. Lowry hi mi bik, zirna lama thahnemngai thei tak niin Lewisburg-a Pastor hna a thawh pah hian Belles Lettres University tih zirna in lar tak ah Professor a ni pah thei nia mawle! Amah hi Kum 1875 khan Doctor of Divinity hlan a ni. Pastor anih hnuhnun ber na chu Plainsfield, New Jersy, Park Avenue Church ah a ni a. A thawhna apiangah mite ngainat leh fak a hlawh thei zel mai. Dr. Lowry hi administration thiam tawnhriat ngah tak , midang rilru hneh thei, pulpit ah emaw hmundang reng reng ah pawh thusawi thiam tawpa sawi anih bakah fiamthu han thawh mai a zei hle bawk.
Tum khat chu chanchinbu hmingthang takah chuan a hla te a lar em avangin an kawm a - “Dr. Lowry, i hla thu phuah mil tur hian music i siam chawp nge, a music mil tur hian hla thu i phuahchawp zawk” tiin an zawhna chu heti hian a chhang:
“Kalphung bik ka nei lo. A chang chuan music rilrua a lan hnu ah a thu in a zui a, ka mood a zir a ni mai. Thu in emaw music in min pawl velah khawlai a ni emaw, hnathawhnaah emaw inah leh khawiah pawh awm ila ka ziah nghal vat mai zel avangin chanchinbu phek ah te, envelope ah te ka hla tam tak hi chu ziah a ni hmasa ber fo.”
Rev. Robert. Lowry hi November ni 25 kum 1899 khan chatuan ramah chawl tawh mah sela, a sermon tha tak tak Pathian fak hla a kan sak te hi chu a nung reng tawh ang.
He hla hi Mizo in hla kan neih hmasak ber zinga mi a ni a, kum 1899-a hlabu hmasa ber chhutah pawh No. 4-naah an dah. Saptawng lamah chuan chang li (4) nei mahse a siam hmasatute hian chang hnihna an let ve lo a, chang dang hian huap tel deuhin an hriat vang a ni mai thei e. Tin, tun Kristian Hla bu a kan neih nen a in anglo nual a, a danglamna ber chu “Isua Krista” tih hi “Ka Isua” tih a ni zel. Chhut hmasa ber hi tarlang ila:
Eng nge sual tifai thei ang?
Ka Isua thishen chaovin;
Eng nge min tidam leh ang
Ka Isua thishen chaovin.
Aw, Isua Thishen
Fai takin min tleng fai,
Faina dang ka hre lo,
Ka Isua thishen lo chu.
Engma om lo sual faina,
Ka Isua thisen lo chu;
Thil tha karin chor love
Ka Isua thishen lo chu.
Aw, Isua, & c.
Engma dang ka duh lo ve,
Ka Isua thishen lo chu;
Chumi chu ka lomma awm
Ka Isua thishen chaoh chu
Aw, Isua, & c.
1)http://lavistachurchofchrist.org/LVarticles/SongsAndHymnsOfRobertLowery.html
2) http://www.wholesomewords.org/biography/blowry.html
3) http://frankviola.org/2012/03/01/thebloodofjesus/
4) Hla leh a phuahtute, Rev. P.D. Sena.
No comments:
Post a Comment